Cidade creativa

Programa · A Coruña cidade creativa

A política cultural do BNG para a cidade da Coruña parte do talento creativo existente e da súa capacidade para liderar un proxecto cultural municipal participado e inclusivo que converta a cidade no epicentro cultural da vida da veciñanza. Este plan está artellado desde tres eixos: cultura de proximidade, cultura desestacionalizada e cultura para a transformación, a divulgación e a cohesión social.

O proxecto cultural do BNG para a cidade atenderá á participación equitativa de homes e mulleres creadoras que tome en conta a diversidade cultural desde unha perspectiva integradora, transversal, plural, feminista, galega e universal.

A cultura da cidade como marca propia é a nosa #CidadeCreativa.

Promoción das bibliotecas como espazos de opinión abertos a toda a cidadanía, integradas na tipoloxía específica de cada barrio, e promoción do pensamento crítico e da análise sobre diferentes temas da actualidade.
Aprobación no Pleno do Plan municipal de bibliotecas.
Reforma da biblioteca de Monte Alto, ampliación da biblioteca da Sagrada Familia e creación da biblioteca municipal de Mesoiro.
Constitución dunha Rede única de bibliotecas públicas da cidade.
Estudo e resolución do proceso de remunicipalización das bibliotecas: avaliando as diferentes posibilidades, garantindo os dereitos laborais do persoal de empresa mais tamén do funcionariado.
Creación da Comisión Municipal de Lectura Pública, como un grupo de traballo do Consello Municipal da Cultura, na que participen os diversos axentes vinculados: librarías, autoras, editoriais, escolas, veciñanza e bibliotecas.
Potenciación das programacións dirixidas a valorizar e visualizar os autores e as autoras galegas.
Incremento do investimento para a compra de fondos e para as actividades culturais nas bibliotecas, traballando coa industria cultural da cidade e fomentando unha economía circular baseada na proximidade.
Creación do evento #PrimaveraCultural aproveitando o 17 de marzo (Día do Cómic), o 20 de marzo (Día da Narración Oral), 21 de marzo (Día da Poesía), o 27 de marzo (Día Mundial do Teatro), o 1 de abril (Día das Artes Galegas), o 2 de abril (Día do Libro Infantil e Xuvenil), o 15 de abril (Día Internacional das Artes), o 23 de abril (Día do Libro), o 29 de abril (Día Internacional da Danza), o 17 de maio (Día das Letras Galegas), o 21 de maio (Día da Diversidade Cultural) e o 9 de xuño (Día dos Arquivos) para facer visíbeis as diversas efemérides que se dan nestas datas.
Apoio ao proxecto de candidatura da Coruña como Cidade Literaria diante da UNESCO, promovida pola Asociación Cultural Alexandre Bóveda.

Mellora da política comunicativa dos museos científicos co fin de aumentar as visitas aos Museos Científicos Coruñeses.
Sinatura de convenios coa Universidade da Coruña e centros de investigación para divulgar o seu labor nas salas dos Museos Científicos Coruñeses.
Creación dun mapa de axentes científicos, tecnolóxicos e innovadores tanto públicos como privados (Universidade, centros de Investigación, start-ups, empresas consolidadas…)
Renovación dos paneis dos Museos Científicos Coruñeses para a súa actualización e bo funcionamento.
Elaboración de material divulgativo, pedagóxico e turístico, así como un espazo virtual que relacione os grandes museos da cidade.

Instalación de placas para a explicación dos nomes das rúas da cidade e da sinalización axeitada para os monumentos representativos da cidade.
Recuperación no posíbel no nomeamento das rúas ou prazas da toponimia tradicional así como corrección daqueles nomes que figuren de xeito deturpado ou incorrecto.
Publicación e distribución estábel de unidades didácticas para a difusión da historia da cidade e dos personaxes históricos da cidade, especialmente das mulleres que foron protagonistas e pioneiras, mais que foron invisibilizadas pola Historia.
Deseño de itinerarios urbanos e encontros para difundir a historia da cidade e colaboración con iniciativas privadas existentes que xa están a poñer en valor a nosa cidade a través de visitas e percorridos guiados.
Dotación de novas instalacións para o arquivo municipal, axeitadas ás súas necesidades de funcionamento, e dixitalización e acceso en liña dos fondos documentais.
Impulso da visualización e dinamización das casas museo da cidade, dotándoas de persoal e orzamento propio, actualizando as súas propostas de oferta cultural.

Posta en marcha dun proxecto de intercambio internacional con outras cidades para os artistas plásticos locais.
Incrementar as canles de colaboración coas galerías e os creadores de arte contemporánea.
Creación de programas de difusión e apoio á creación de artistas plásticos e visuais realizada pola mocidade.
Apoio e difusión ao sector audiovisual da Coruña: escaparate da cidade a nivel nacional, estatal e internacional.
Reforzo e potenciación da Fundación Luís Seoane como elemento de atracción cultural da nosa cidade e unha ferramenta de proxección da cidade da Coruña no eido das artes plásticas contemporáneas: impulso do proxecto de musealización e elaboración dun plan de posta en valor do legado de Luís Seoane.
Recuperación do espírito formativo do Museo de Arte Contemporáneo e os proxectos desde museo como as bolsas e residencias de creación local e no estranxeiro, a convocatoria competitiva de carácter bienal ou o proxecto didáctico e de divulgación artística.
Potenciación da Coruña como Cidade do Cómic, revitalizando o programa de Viñetas desde o Atlántico, incorporando novas actividades, estendendo a presenza da banda deseñada ao resto do ano e contando coa participación de libreiros, autoras e bibliotecas na súa organización.
Reforzar a rede cultural de base ao redor dos centros cívicos dos barrios contando coa cidadanía como axente participativo e transmisor cultural.

Programación de actuacións de agrupacións de danza, arte en movemento, circo e música en espazos públicos e edificios singulares.
Programación estábel anual de teatro galego.
Proposta para cambiar a denominación do Teatro Colón para pasar a chamarse Teatro María Casares.
Programación estábel de actuacións nos recintos municipais de artes escénicas dirixida a novos públicos, distribuída entre os barrios, centrada en novas disciplinas como o teatro e danza contemporánea, o novo circo, a maxia e o cabaré, os espectáculos multimedia, a maxia e a música non comercial.
Potenciación da Sala O Túnel como espazo preferente para a exhibición de programacións de novas tendencias, reforzo dos locais de ensaio co aumento da conexión en autobús con esta infraestrutura.
Posta en marcha dun plan para facilitar a realización de espectáculos nos locais da cidade, cunha ordenanza para simplificar administrativamente os permisos e un programa de alianza entre o Concello e os locais para garantir a actividade creativa na cidade, todo isto para cumprir a Lei galega de espectáculos públicos e manter a actividade cultural de iniciativa privada da cidade.
Incremento da presenza de intérpretes e autores galegos no cadro de persoal e na programación da Orquestra Sinfónica de Galicia.
Potenciación da Banda Municipal de Música: cobertura de vacantes, aumento do orzamento para a súa actividade, aumento da difusión da súa programación, dotación dunha infraestrutura suficiente para o ensaio e catalogación e dixitalización dos fondos documentais históricos.
Creación de espazos con dotación técnica para poder ensaiar e programas de residencias neses espazos.

Deseño unha liña de axudas económicas cuxas/os beneficiarias/os serían as creadoras locais, das diferentes disciplinas artísticas, a cambio, por unha banda, de que abran os seus estudios, lugares de ensaio ou de creación artística e, por outra, de que leven a cabo unha programación anual aberta ao público.
Negociación coa Universidade da Coruña para que na chamada Cidade das TIC se poida situar un laboratorio de deseño, creación e fabricación vencellado á innovación e ás tecnoloxías da información e a comunicación.
Deseño dun regulamento para as infraestruturas culturais públicas da cidade: onde figure unha distribución do tipo de exposicións, pezas ou obras que se poden mostrar ou representar en cada unha delas e tamén se regule o acceso das/os distintas/os creadoras/os e entidades culturais da cidade para poderen expoñer en cada unha delas.
Creación dunha Axenda Cultural Municipal que recompile e ensanche a visibilidade de toda a actividade cultural que na cidade se produce diariamente desde os diferentes axentes culturais.
Creación dun censo de traballadoras e traballadores da cultura e do espectáculo así como un catálogo de recursos culturais da cidade que difunda o seu labor creativo, facilite o labor de intercomunicación e o de promoción exterior do seu mercado laboral.
Habilitación de espazos multiusos en centros municipais para que os creadores locais poidan desenvolver alí os procesos de creación e produción.
Recuperación da festa anual da cultura, Achegarte.
Creación dun programa de residencias artísticas que contribúan co proceso e tempo creativo das autoras e autores das diferentes disciplinas.

Constitución do Consello Municipal de Cultura.
Recuperación do edificio da antiga prisión provincial da Coruña e constitución nel dun espazo vivo de creación e difusión cultural.
Instauración de cheques culturais para o acceso á cultura da mocidade e de persoas en risco de exclusión social, para garantir o dereito de acceso á cultura independentemente dos recursos económicos.
Estabelecemento dunha rede de espazos para a difusión cultural que cubra todos os barrios da cidade, mediante acordos con entidades públicas e privadas.
Estabelecemento dun programa de actuación para promover o acceso á programación cultural de colectivos desfavorecidos ou da poboación migrante, que represente un intercambio cultural retroalimentador.

Catalogación, inventario, estudo e coñecemento do patrimonio histórico–artístico, arqueolóxico, etnográfico e eco-xeográfico.
Reformulación do proxecto museístico do Castelo de Santo Antón para o converter nun museo vinculado á propia fortaleza e á súa historia, derivando os fondos históricos e arqueolóxicos alí presentes a un museo arqueolóxico propiamente dito.
Posta en marcha dun plan especifico para o Castro de Elviña: centro de interpretación e información; actuacións para a exhibición in situ do alí escavado e extraído.
Impulso dunha política de recoñecemento e valorización dos bens de interese cultural.
Promoción da declaración de bens de interese cultural de bens móbeis, inmóbeis e inmateriais de interese artístico, histórico, arquitectónico, arqueolóxico, etnográfico, científico ou técnico como o antigo Cárcere Provincial.
Sinatura de convenios con particulares que teñan bens de interese histórico-artístico e/ou cultural para fomentar o seu uso público, total ou parcial.
Instalación de institucións e servizos públicos en edificios de valor histórico e cultural.
Protección dos estabelecementos históricos comerciais ou de hostalaría na Coruña de arraigada tradición unida á cidade.
Creación da ruta urbana dos petróglifos.
Creación do Arquivo da Memoria Oral da Cidade.

Cidade creativa

Alternativa Proxecto de cidade Solucións á mobilidade Unha razón: A Coruña Punta de lanza de Galiza A Coruña dos Barrios Calidade de vida Deporte é saúde Capital cultural